Аԥсны Аҳәынҭқарра ахада,

Аԥсны Арратә мчқәа ркомандаҟаҵаҩ хада

Бжьаниа А. Г.

Ҳаҭыр зқәу Аслан Гьаргь-иԥа!

Аԥсны Аҳәынҭқарра Атәылахьчара аминистрра анапхгара, Аԥсны Арратә мчқәа рыррамаҵзурауаа, хаҭала сара, ҳахьӡала гәык-ԥсык ала ишәыдысныҳәалоит шәира амшныҳәа!

Иахьа, акырӡа иуадаҩу аамҭақәа рзы, Аԥсни аԥсуа жәлари ԥхьаҟа реизҳазыӷьаразы ишәылшо зегь ҟаҵо  ҳтәыла анапхгара ашәҭоит.

Атәыла рнапхгараҿы аҟазаара – иуадаҩӡоу анапынҵақәа ируакуп. Ишәзеиӷьасшьоит абри аус аҿы еиԥҟьара змауа, шәхықәкқәа рынагӡара алзыршо амчра ду!

Шәыԥсҭазаара аиҳарак шәыԥсадгьыл амаҵ азура иазкын. Тәылауаҩ-патриотк иҳасаб ала  шәнап ианыз аусқәа зегьы ҭакԥхықәра ҳаракыла шәазнеиуан.

Шәыламысцқьара, аџьахьы иаашәырԥшуа абзиабара, ауаа ҳаҭыр-патула рацәажәашьа Аԥсны аҩныҵҟаиԥш анҭыҵгьы шәыхьӡ-шәыԥша ашьҭыхра алдыршоит.

Аԥсни аԥсуа жәлари рыԥсҭазаара аиӷьтәразы шәџьабаа алҵшәа бзиа аиуааит. Иҟалааит Аԥсны азакәан ҵаҵӷәы змоу, адунеитә уаажәларра зҿыԥшуа тәыланы.

Ҳаҭыр зқәу Аслан Гьаргь-иԥа, ишәыдышәкыл гәык-ԥсыктәи ҳадныҳәаларақәа: агәабзиара, агәамч, ашықәснҵыра ду, Аԥсадгьыл амаҵ азураҿы ақәҿиара дуқәа.

Ҭаацәаныла анасыԥ лаша шәыгмыз.

Ҳаҭырла,

Атәылахьчара аминистр,

аинрал-полковник Ануа В. И.