ԥсны Атәылахьчара аминистрра, Аԥсны жәлар Рџьынџьтәылатә еибашьра аветеранцәа руаажәларратә еиҿкаара «Аруаа» Иреиҳаӡоу ахеилак алахәыла Ҭемур Надараиа «Аԥсны Арбџьар мчқәа рҟны аҭагылазаашьеи» Аԥсны Арратә мчрақәа рофицертә еилазаареи рзы иҟаиҵаз аҳәамҭеи асоциалтә ҳақәа рҿы уи  инамаданы ицәырҵыз акьыԥхьымҭақәеи агәеибакра ду азцәырыргеит.

Асеиԥш иҟоу аҳәамҭақәа Атәылахьчара аминистрра ахьӡ-аԥша ҵыршәаауеит, ажәлар Арбџьар мчқәа рахь ирымоу агәрагара еиҵарҟьоит.

Ажәлар агәра ргаӡом ҵаҵӷәы змам амц-ԥаршеи. Ааԥхьара ҟаҳҵоит Аԥсадгьыл амаҵ азура зыԥсҭазаара азку апатриотцәа иашақәа рыхьӡ аҵәыхьшьра хықәкыс измоу ауаа  имҩаԥырго апровокациақәа азхьаԥшра рырымҭаларц.

Иазгәаҳамҭар алшом Атәылахьчаратә усбарҭа аҳәынҭқарра ашәарҭадараз ауснагӡатәқәа шымҩаԥнаго. Аҳәынҭқарра ашәарҭадара, ари ауаажәларра, хаҭа-хаҭала атәылауаа ринтересқәеи рзинқәеи рыхьчароуп, атәыла аҵакыратә акзаара аиқәырхароуп, аконституциатә шьақәгылара анҭыҵынтәи ашәарақәа рацәыхьчароуп.