Аҩызцәа аррамаҵзура ауаа, афицарцәа, аинралцәа, Аԥсны Арбџьар мчқәа рветеранцәа! Ҳаҭыр зқәу Аԥсны Аҳәынҭқарра атәылауаа!

Ашықәс ҿыц аныҳәа ҳашәхымс ихгылоуп. Традицианы иҟоуп иреиӷьу агәыӷрақәа ашықәс аныҳәа хада радҳәалара. Ҳәарада ҳаргьы ҳақәгәыӷуеит ҳазҭало 2024 шықәса арратә мчрақәа, аҳәынҭқарра, ауаажәларра – иреиӷьӡоу аҭагылазаашьақәа рзаанагап ҳәа.

Ииасыз ашықәс иаҳнаҭеит аԥышәа ҿыц, иаҳзаанагеит аихьӡарақәа. Аԥсны Арратә мчрақәа рҿаԥхьа иқәгылаз аусдҵақәа шьаҿа-шьаҿала рынагӡара алыршахеит. Цәыббра 30 рзы Аԥсны ажәлари Арбџьар мчқәеи иазгәарҭеит иреиҳау ҳамшныҳәа – Аиааира Амш. Аҩаӡара ҳарак аманы имҩаԥган арратә парад.

Ашықәс ҿыц аламҭалазы Аԥсны ахьыԥшымреи ахақәиҭреи рзы зхы иамеигӡоз аԥсадгьыл ахьчаҩцәа  рҿаԥхьа аҽазныкгьы ҳхырхәоит.

Ҳаҭыр зқәу аҩызцәа!

Ишәзаанагааит иааиуа ашықәс ҿыц аҭынчра, агәырӷьара, аихьӡарақәа, иҟалааит алшара дуқәа!

Дасу ҭаацәала, шәыуа-шәҭахыра, шәыззаигәо, ишәывагылоу ауаа нашәыдкыланы ишәыдысныҳәалоит 2024-тәи Ашықәс ҿыц!