Аԥсны Аҳәынҭқарра Атәылахьчара аминистрреи Арбџьар Мчқәа рыррамаҵзурауааи рыхьӡала Аԥсны ахақәиҭреи ахьыԥшымреи рзы ақәԥара иалахәыз, аԥсадгьыл атәылауаҩ, апатриот, хатәгәаԥхарала еибашьуаз Аҭрышба Кавказ иԥсҭазаара иалҵра инамаданы, гәалсра дула ҳшәыдашшылоит.

Аԥсны жәлар Рџьынџьтәылатә еибашьра ианалага, Кавказ Аҭрышба амца зхақьоуқьадуаз иабацәа рыдгьыл Аԥсны ахьчаразы даауеит. Гәымсҭатәи афронт аҿы ирццаку аҭакҟаҵаратә ҟәша далахәны  деибашьуан. Активла далахәын иҷыдоу армч гәыԥ "Ирбис" ашьақәыргылара. Кавказ хаҭала «Ирбис» аибашьцәа азыҟаиҵон, командаҟаҵаҩысгьы дыҟан. Агәыԥ хаҭала ар ркомандаҟаҵаҩ Хада Владислав Арӡынба инапаҵаҟа иҟан.

Атәылахьчара Аминистрра аструктуратә ҟәша аҳасабала «Ирбис» Гал, аҩадатәи азонаҿы иҟоу аҳәаахьчаратә ҭыԥ аҿы ашәарҭадараз иҷыдоу аусмҩаԥгатәқәа ирылахәын.

Аибашьра анеилга ашьҭахь Кавказ Аҭрышба Аԥсны даанхеит. 1995 шықәсанӡа Владислав Арӡынба ихьчараз ашәарҭадаратә ҟәшаҿы аус иуан. 2021 шықәса мшаԥымза инаркны Ҭырқәтәыла иҟоу Аԥсны Аҳәынҭқарра Азинмчы змоу Ахаҭарнакраҿы аус иуан, хышықәса рыҩныҵҟа аҭакԥхықәра аарԥшуа иԥсадгьыл аинтересқәа ихьчон.

Кавказ Аҭрышба наунагӡа ҳгәалашәараҿы даанхоит згәы еиҭамԥоз, ифырхаҵаз, игәымшәаз еибашьҩык иаҳасаб ала. Иаамҭамкәа иԥсҭазаара иалҵра ҳреспублика зегьы азы цәыӡ дууп, иаахоуп.

Наунагӡа ҳгәалашәара далазаауеит. Иихьчоз, зымаҵ иуаз иџьынџьдгьыл Аԥснаҿы ахааназ ихьӡ хашҭра ақәымкәа иаанхоит.